www.khabarnama.com  {Punjabi Newspaper Khabarnama Toronto} email: editor@khabarnama.com 


 

ਅਖ਼ਬਾਰ ਪੜ੍ਹਨ ਲਈ ਪੰਜਾਬੀ  ਫਾਂਟ ਇੱਥੋਂ ਡਾਊਂਨਲੋਡ ਕਰ

 

 

Click here  to download Punjabi font to read Khabarnama

 

ਛੱਜ ਤਾਂ ਬੋਲੇ ਛਾਨਣੀ ਕਿਉਂ ਬੋਲੇ?

ਟਰੱਕਜ਼ ਸਟਰਾਈਕ ਨੂੰ ਖ਼ਤਮ ਕਰਵਾਉਣ ਲਈ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ 14 ਫਰਵਰੀ ਨੂੰ ਐਮਰਜੰਸੀ ਐਕਟ ਲਾਗੂ ਕਰ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਆਟਵਾ ਦੀ ਸਿਟੀ ਕੌਂਸਲ ਅਤੇ ਫਿਰ ਓਨਟੇਰੀਓ ਦੀ ਸੂਬਾ ਸਰਕਾਰ ਨੇ ਐਮਰਜੰਸੀ ਲਾਗੂ ਕੀਤੀ ਸੀ। 14 ਫਰਵਰੀ ਤੱਕ ਟਰੱਕਜ਼ ਸਟਰਾਈਕ ਕਾਫੀ ਕਮਜ਼ੋਰ ਪੈ ਚੁੱਕੀ ਸੀ ਅਤੇ ਅਮਰੀਕਾ ਨਾਲ ਸਰੱਹਦੀ ਲਾਂਘੇ ਖਾਲੀ ਕਰਵਾ ਲਏ ਗਏ ਸਨ। ਸਿਰਫ ਆਟਵਾ ਵਿੱਚ ਪਾਰਲੀਮੈਂਟ ਹਿੱਲ ਦੇ ਖੇਤਰ ਵਿੱਚ ਕੁਝ ਬਲਾਕ ਦਾ ਏਰੀਆ ਰੋਸਕਾਰੀਆਂ ਦੇ ਕਬਜ਼ੇ ਹੇਠ ਸੀ ਅਤੇ ਉਹਨਾਂ ਦੀ ਗਿਣਤੀ ਵੀ ਮਸਾਂ ਚੌਥਾ ਜਾਂ ਪੰਜਾਵਾਂ ਹਿੱਸਾ ਹੀ ਰਹਿ ਗਈ ਸੀ। ਸਵਾਲ ਪੈਦਾ ਹੁੰਦਾ ਹੈ ਕਿ ਇਸ ਹਾਲਤ ਵਿੱਚ ਐਮਰਜੰਸੀ ਐਕਟ ਲਾਗੂ ਕਰਨ ਦੀ ਕੀ ਲੋੜ ਸੀ? ਕੀ ਆਮ ਹਾਲਤਾਂ ਵਿੱਚ ਜੋ ਤਾਕਤਾਂ ਪੁਲਿਸ ਕੋਲ ਹੁੰਦੀਆਂ ਹਨ, ਉਹ ਇਸ ਮਾਮੂਲੀ ਸਮੱਸਿਆ ਦੇ ਹੱਲ ਲਈ ਕਾਫੀ ਨਹੀਂ ਸਨ? ਕੀ ਆਟਵਾ ਸਿਟੀ ਵਿੱਚ ਲਾਗੂ ਕੀਤੀ ਐਮਰਜੰਸੀ ਆਟਵਾ ਦੀ ਸਥਿਤੀ ਨਾਲ ਨਜਿੱਠਣ ਲਈ ਕਾਫੀ ਨਹੀਂ ਸੀ? ਇਸ ਤੋਂ ਵੀ ਅੱਗੇ ਵਧ ਕੇ ਜਦ ਓਨਟੇਰੀਓ ਸੂਬੇ ਨੇ ਐਮਰਜੰਸੀ ਲਾਗੂ ਕਰ ਦਿੱਤੀ ਤਾਂ ਇਸ ਨਾਲ ਪੁਲਿਸ ਅਤੇ ਸਰਕਾਰ ਨੂੰ ਕਾਫੀ ਤਾਕਤਾਂ ਨਹੀਂ ਸਨ ਮਿਲ ਗਈਆਂ? ਆਟਵਾ ਵੀ ਓਨਟੇਰੀਓ ਸੂਬੇ ਦਾ ਹਿੱਸਾ ਹੈ ਅਤੇ ਸੁਬਾਈ ਐਮਰਜੰਸੀ ਆਟਵਾ ਵਿੱਚ ਵੀ ਬਰਾਬਰ ਲਾਗੂ ਹੁੰਦੀ ਹੈ। ਕੀ ਆਟਵਾ ਪੁਲਿਸ ਟਰੂਡੋ ਦੀ ਲਗਾਈ ਐਮਰਜੰਸੀ ਨਾਲ ਰੋਸਕਾਰੀਆਂ ਉੱਤੇ ਹੋਰ ਕਿਸਮ ਦੇ ਚਾਰਜਜ਼ ਲਗਾਏਗੀ ਜਾਂ ਸਧਾਰਨ ਟਰਾਸਪਾਸਿੰਗ, ਮਿਸਚਿਪ, ਅਤੇ ਗੈਰ ਕਾਨੂੰਨ ਪਾਰਕਿੰਗ ਆਦਿ ਦੀਆਂ ਮੱਦਾਂ ਹੀ ਵਰਤੇਗੀ? ਜਸਟਿਨ ਟਰੂਡੋ ਨੇ ਰੋਸਕਾਰੀਆਂ ਨਾਲ ਖੁਦ ਇੱਕ ਵਾਰ ਵੀ ਗੱਲਬਾਤ ਕਰਨੀ ਜਾਇਜ਼ ਨਹੀਂ ਸਮਝੀ। ਏਥੋਂ ਤੱਕ ਕੇ ਉੱਚ ਅਧਿਕਾਰੀ ਪੱਧਰ 'ਤੇ ਵੀ ਗੱਲਬਾਤ ਨਹੀਂ ਕੀਤੀ ਗਈ ਸਗੋਂ ਟਰੂਡੋ ਨੇ ਇਹ ਆਖ ਕੇ ਗੱਲਬਾਤ ਦੇ ਦਰਵਾਜ਼ੇ ਬੰਦ ਕਰ ਦਿੱਤੇ ਕਿ ਰੋਸਕਾਰੀ ਟਰੱਕਿੰਗ ਕਿੱਤੇ ਦੇ ਨੁਮਾਂਇੰਦਗੀ ਹੀ ਨਹੀਂ ਕਰਦੇ। ਟਰੂਡੋ ਨੇ ਐਮਰਜੰਸੀ ਲਗਾ ਕੇ ਆਪਣੀ ਸਰਕਾਰ ਅਤੇ ਪੁਲਿਸ ਨੂੰ ਅਥਾਹ ਤਾਕਤਾਂ ਨਾਲ ਲੈਸ ਕਰ ਲਿਆ ਹੈ ਜੋ ਸਿਵਲ ਹੱਕਾਂ ਉੱਤੇ ਸਿੱਧਾ ਛਾਪਾ ਹੈ। ਉਧਰ ਪ੍ਰਧਾਨ ਮੰਤਰੀ ਫਰੀਲੈਂਡ ਨੇ ਇਹਨਾਂ ਐਮਰਜੰਸੀ ਤਾਕਤਾਂ ਬਾਰੇ ਸਪਸ਼ਟ ਕਰ ਦਿੱਤਾ ਹੈ ਕਿ ਰੋਸਕਾਰੀਆਂ ਦੇ ਹਵੀਕਲ (ਟਰੱਕ -ਟਰੇਲੇ ਵਗੈਰਾ) ਜ਼ਪਤ ਕੀਤੇ ਜਾ ਸਕਦੇ ਹਨ, ਹਿੱਸਾ ਲੈਣ ਵਾਲੀਆਂ ਕੰਪਨੀਆਂ ਦੇ ਵਹੀਕਲ ਜ਼ਪਤ ਕੀਤੇ ਜਾ ਸਕਦੇ ਹਨ, ਇੰਨਸ਼ੋਰੈਂਸ ਰੱਦ ਕੀਤੀ ਜਾ ਸਕਦੀ ਹੈ, ਕੰਪਨੀਆਂ ਦੇ ਬੈਂਕ ਖਾਤੇ ਸੀਜ਼ ਕੀਤੇ ਜਾ ਸਕਦੇ ਹਨ, ਨਿੱਜੀ ਬੈਂਕ ਖਾਤੇ ਸੀਜ਼ ਕੀਤੇ ਜਾ ਸਕਦੇ ਹਨ। ਰੋਸਕਾਰੀਆਂ ਨੂੰ ਤੇਲ, ਪਾਣੀ ਦੇਣ ਵਾਲੇ ਚਾਰਜ ਕੀਤੇ ਜਾ ਸਕਦੇ ਹਨ, ਰੋਸਕਾਰੀਆਂ ਨੂੰ $5-5 ਹਜ਼ਾਰ ਫਾਈਨ ਕੀਤਾ ਜਾ ਸਕਦਾ ਹੈ ਅਤੇ ਹੋਰ ਬਹੁਤ ਕੁਝ ਕੀਤਾ ਜਾ ਸਕਦਾ ਹੈ। ਫੰਡ ਇੱਕਠਾ ਕਰਨ ਉੱਤੇ ਰੋਕ ਲਗਾ ਦਿੱਤੀ ਗਈ ਹੈ ਅਤੇ ਇਕੱਠਾ ਕੀਤਾ 9-10 ਮਿਲੀਅਨ ਡਾਲਰ ਜ਼ਪਤ ਕਰ ਲਿਆ ਗਿਆ ਹੈ। ਇਹ ਸੱਭ ਡਿਕਟੇਟਰਾਨਾ ਕਾਰਵਾਈਆਂ ਹਨ ਜੋ ਜਮਹੂਰੀਅਤ ਦਾ ਕਥਿਤ ਰਾਖਾ ਟਰੂਡੋ ਕਰ ਰਿਹਾ ਹੈ ਅਤੇ ਜਗਮੀਤ ਸਿੰਘ ਦੀ ਐਨਡੀਪੀ ਉਸ ਨੂੰ ਹੋਰ ਓਕਸਾ ਰਹੀ ਹੈ। ਰੋਸਕਾਰੀ ਆਖਰ ਮੰਗਦੇ ਕੀ ਸਨ? ਉਹ ਲਾਜ਼ਮੀ ਕੋਰੋਨਾ ਟੀਕਾਕਰਨ, ਵੈਕਸੀਨ ਪਾਸਪੋਰਟ, ਕੋਰਨਟੀਨ ਅਦਿ ਬੰਦਸ਼ਾਂ ਤੋਂ ਛੋਟ ਮੰਗਦੇ ਸਨ। ਕੈਨੇਡਾ ਦਾ ਹਰ ਸੂਬਾ ਅਤੇ ਸੰਸਾਰ ਦਾ ਹਰ ਦੇਸ਼ ਕੋਰੋਨਾ ਬੰਦਸ਼ਾਂ ਹਟਾ ਰਿਹਾ ਹੈ। ਅਜੇਹੇ ਵਿੱਚ ਰੋਸਕਾਰੀਆਂ ਨਾਲ ਗੱਲਬਾਤ ਦੁਆਰਾ ਹੱਲ ਹੋ ਸਕਦਾ ਸੀ ਪਰ ਟਰੂਡੋ ਨੇ ਸਿਰੇ ਦਾ ਤਾਨਾਸ਼ਾਹੀ ਕਦਮ ਚੁੱਕਿਆ ਹੈ ਜਿਸ ਨਾਲ ਛੱਤੀ ਸੌ ਛੇਕ ਨੰਗਾ ਹੋ ਗਿਆ ਹੈ। ਛੱਜ ਤਾਂ ਬੋਲੇ ਛਾਨਣੀ ਕਿਉਂ ਬੋਲੇ?

-ਬਲਰਾਜ ਦਿਓਲ, ਖ਼ਬਰਨਾਮਾ #1169, ਫਰਵਰੀ 18-2022

 


 

ਟਰੱਕਰਜ਼ ਪ੍ਰੋਟੈਸਟ, ਕਿਸਾਨ ਮੋਰਚਾ ਅਤੇ ਹਿਪੋਕਰੇਟ ਜਸਟਿਨ ਟਰੂਡੋ!

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਆਪਾ-ਵਿਰੋਧੀ ਗੱਲਾਂ ਕਰਨ, ਬਦਲਵੇਂ ਅਤੇ ਤਿਲਕਵੇਂ ਸਟੈਂਡ ਲੈਣ ਦਾ ਆਦੀ ਸਿਆਸਤਦਾਨ ਹੈ। ਟਰੂਡੋ ਨੂੰ ਕੈਨੇਡਾ ਦਾ ਮਹੁੰਮਦ ਤੁਗਲਕ ਆਖਣਾ ਗ਼਼ਲਤ ਨਹੀਂ ਹੋਵੇਗਾ। ਮਹੁੰਮਦ ਤੁਗਲਕ ਭਾਰਤ ਦਾ ਪੜ੍ਹਿਆ ਲਿਖਿਆ ਮੂਰਖ ਬਾਦਸ਼ਾਹ ਗਿਣਿਆਂ ਜਾਂਦਾ ਹੈ। ਟਰੂਡੋ ਕਦੇ ਵੀ ਕਿਸੇ ਐਲਾਨੇ ਵਾਅਦੇ ਅਤੇ ਨੀਤੀ ਉੱਤੇ ਕਾਇਮ ਨਹੀਂ ਰਿਹਾ ਜਿਸ ਵਿੱਚ ਅਣਗਿਣਤ ਚੋਣ ਵਾਅਦੇ ਹਨ ਜੋ ਟਰੂਡੋ ਨੇ ਡੰਕੇ ਦੀ ਚੋਟ ਉੱਤੇ ਲਗਾਤਾਰ ਤੋੜੇ ਹਨ।  ਕੈਨੇਡਾ ਦੀ ਡੈਮੋਗਰਾਫੀ ਇਸ ਢੰਗ ਅਤੇ ਤੇਜ਼ੀ ਨਾਲ ਬਦਲੀ ਹੈ ਤੇ ਬਦਲੀ ਜਾ ਰਹੀ ਹੈ, ਕਿ ਹੁਣ ਇਸ ਦੇਸ਼ ਵਿੱਚ ਵਾਅਦੇ ਪੂਰੇ ਕਰਨ ਦੀ ਲੋੜ ਖ਼ਤਮ ਹੁੰਦੀ ਜਾ ਰਹੀ ਹੈ। ਕਰਾਈਮ, ਫਰਾਡ, ਮੁਜਰਮਾਨਾ ਕਾਰਵਾਈਆਂ, ਨਸ਼ਿਆਂ, ਧਾਰਮਿਕ ਕੱਟੜਵਾਦ ਵਰਗੇ ਕਾਰਿਆਂ ਵੱਲ ਅੱਖਾਂ ਬੰਦ ਕਰੀ ਰੱਖਣ ਅਤੇ ਖੈਰਾਤ ਵੰਡਣ ਵਾਲਾ ਆਗੂ ਹੀ ਕਾਮਯਾਬ ਹੁੰਦਾ ਹੈ।

ਦੋ ਕੁ ਹਫ਼ਤੇ ਪਹਿਲਾਂ ਆਟਵਾ ਵਿੱਚ ਟਰੱਕਰਜ਼ ਦੇ ਇੱਕ ਆਰਗੇਨਾਈਜ਼ਡ ਗਰੁਪ ਵਲੋਂ ਵੈਕਸੀਨ ਨੂੰ ਲਾਜ਼ਮੀ ਕੀਤੇ ਜਾਣ ਤੇ ਮਹਾਂਮਾਰੀ ਸਬੰਧੀ ਪਾਬੰਦੀਆਂ ਦਾ ਵਿਰੋਧ ਕਰਨ ਲਈ ਟਰੱਕਰਜ ਪ੍ਰੋਟੈਸਟ ਸ਼ੁਰੂ ਕੀਤਾ ਗਿਆ ਜਿਸ ਨੂੰ ਫਰੀਡਮ ਕੌਨਵੌਏ ਦਾ ਨਾਮ ਵੀ ਦਿੱਤਾ ਜਾ ਰਿਹਾ ਹੈ ਅਤੇ ਇਸ ਦਾ ਅਸਰ ਟੋਰਾਂਟੋ ਤੋਂ ਇਲਾਵਾ ਕੈਨੇਡਾ - ਅਮਰੀਕਾ ਬਾਰਡਰ ਕਰਾਸਿੰਗਜ਼ 'ਤੇ ਵੀ ਹੋਇਆ ਹੈ। ਇਸ ਨਾਲ ਲੋਕਾਂ ਨੂੰ ਅਸੁਵਿਧਾ ਹੋਈ ਹੈ ਅਤੇ ਹੋ ਰਹੀ ਹੈ। ਪਰ ਇਸ ਦੌਰਾਨ ਪ੍ਰਧਾਨ ਮੰਤਰੀ ਟਰੂਡੋ ਕਿੱਥੇ ਹੈ ਅਤੇ ਉਸ ਦਾ ਸਟੈਂਡ ਕੀ ਹੈ? ਪਹਿਲਾਂ ਤਾਂ ਪ੍ਰਧਾਨ ਮੰਤਰੀ ਗਾਇਬ ਹੋ ਗਿਆ।  ਉਸ ਦੇ ਪਰਿਵਾਰ ਨੂੰ ਖ਼ਤਰਾ ਹੋਣ ਦਾ ਬਹਾਨਾ ਬਣਾ ਕੇ ਸਰਕਾਰੀ ਰਹਾਇਸ਼ ਤੋਂ ਕਿਸੇ ਗੁਪਤ ਜਗਾ੍ਹ ਪਹੁੰਚਾ ਦਿੱਤਾ ਗਿਆ ਅਤੇ ਫਿਰ ਕੋਰੋਨਾ ਪਾਜ਼ੇ਼ਟਿਵ ਦੱਸ ਕੇ ਇਕਾਂਤਵਾਸ ਦਾ ਬਹਾਨਾ ਘੜ ਲਿਆ ਗਿਆ। ਟਰੱਕਰਜ ਪ੍ਰੋਟੈਸਟ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਮਿਲ ਰਹੇ ਸੰਕੇਤਾਂ ਕਾਰਨ ਜਦ ਦੇਸ਼ ਨੂੰ ਕਾਰਗਰ ਅਗਵਾਈ ਦੀ ਲੋੜ ਸੀ ਤਾਂ ਪ੍ਰਧਾਨ ਮੰਤਰੀ ਗਾਇਬ ਸੀ। ਹੁਣ ਜਦ ਟਰੂਡੋ ਸੰਸਦ ਵਿੱਚ ਪ੍ਰਗਟ ਹੋਇਆ ਹੈ ਤਾਂ ਮਸਲੇ ਦੇ ਹੱਲ ਲਈ ਇੱਕ ਵੀ ਠੋਸ ਕਦਮ ਚੁੱਕਣ ਵਿੱਚ ਨਾਕਾਮ ਰਿਹਾ ਹੈ। ਟਰੂਡੋ ਨੇ ਸੰਸਦ ਵਿੱਚ ਕਿਹਾ ਹੈ ਕਿ ਗੈਰ-ਕਾਨੂੰਨੀ ਪ੍ਰਦਰਸ਼ਨ ਕਰਨਾ, ਚੱਕਾਜਾਮ ਕਰਨਾ ਬਰਦਾਸ਼ਤ ਕਰਨ ਯੋਗ ਨਹੀਂ ਹਨ ਕਿਉਂਕਿ ਇਸ ਨਾਲ ਕਾਰੋਬਾਰ 'ਤੇ ਮਾੜਾ ਪ੍ਰਭਾਵ ਪੈਂਦਾ ਹੈ।

ਏਸੇ ਟਰੂਡੋ ਨੇ ਭਾਰਤ ਵਿੱਚ ਕਿਸਾਨ ਮੋਰਚੇ ਦਾ ਬਹੁਤ ਖੁੱਲ ਕੇ ਸਮਰਥਨ ਕੀਤਾ ਸੀ ਅਤੇ ਗੁਰੂ ਨਾਨਕ ਦੇਵ ਜੀ ਦੇ ਗੁਰਪੁਰਬ ਮੌਕੇ ਵਧਾਈ ਸੰਦੇਸ਼ ਵਿੱਚ ਘੁਸੇੜਕੇ ਭਾਰਤ ਦੀ ਰਾਜਧਾਨੀ ਨੂੰ ਘੇਰਾ ਪਾਉਣ ਵਾਲਿਆਂ ਦਾ ਸਮਰਥਨ ਕੀਤਾ ਸੀ। ਟਰੂਡੋ ਨੂੰ ਉਹਨਾਂ ਦਾ ਅਤੇ ਰੋਸ ਕਰਨ ਦੇ ਜਮਹੂਰੀ ਹੱਕਾਂ ਦਾ ਬਹੁਤ ਫਿਕਰ ਸੀ। ਟਰੂਡੋ ਦੇ ਮੰਤਰੀਆਂ ਅਤੇ ਸੰਤਰੀਆਂ ਨੇ ਭਾਰਤ ਵਿਰੋਧ ਰੋਹ ਓਕਸਾਉਣ ਵਾਲੇ ਬਿਆਨਾਂ ਅਤੇ ਟਵੀਟਾਂ ਦੀ ਝੜੀ ਲਗਾ ਦਿੱਤੀ ਸੀ। ਅੱਜ ਕੈਨੇਡਾ ਵਿੱਚ ਹੋ ਰਹੇ ਟਰੱਕਰਜ਼ ਪ੍ਰੋਟੈਸਟ ਦਾ ਕੋਈ ਠੋਸ ਕਾਰਨ ਨਹੀਂ ਹੈ ਅਤੇ ਭਾਰਤ ਵਿੱਚ ਕਥਿਤ ਕਿਸਾਨ ਅੰਨਦੋਲਨ ਦਾ ਵੀ ਕੋਈ ਠੋਸ ਕਾਰਨ ਨਹੀਂ ਸੀ। ਇਸ ਪ੍ਰੋਟੈਸਟ ਵਿੱਚ ਟਰੱਕਰਜ਼ ਹਨ ਅਤੇ ਓਸ ਪ੍ਰੋਟੈਸਟ ਵਿੱਚ ਕਿਸਾਨ ਸਨ ਪਰ ਦੋਵਾਂ ਵਿੱਚ ਤੂਤੀ ਅਰਾਜਕਤਾਵਾਦੀਆਂ, ਓਪੱਦਰੀਆਂ, ਦੇਸ਼ ਵਿਰੋਧੀਆਂ ਅਤੇ ਸਿਆਸੀ ਰੋਟੀਆਂ ਸੇਕਣ ਵਾਲਿਆਂ ਦੀ ਹੀ ਬੋਲਦੀ ਸੀ ਅਤੇ ਹੈ।

ਜਸਟਿਨ ਟਰੂਡੋ ਬਹੁਤ ਵੱਡਾ ਹਿਪੋਕਰੇਟ ਹੈ ਜੋ ਦੂਹਰੇ ਮਾਪਦੰਡਾਂ ਦਾ ਮਾਹਰ ਹੈ। ਲੋਕਾਂ ਦੀ ਸੁਵਿਧਾ ਲਈ ਇਸ ਪ੍ਰੋਟੈਸਟ ਦਾ ਜਲਦੀ ਅੰਤ ਹੋਣਾ ਚਾਹੀਦਾ ਹੈ ਪਰ ਭਾਰਤ ਦੇ ਮਾਮਲੇ ਵਿੱਚ ਮਹੁੰਮਦ ਤੁਗਲਕ ਨੇ ਰੋਸ ਦੇ ਹੱਕ ਦਾ ਜੋ 'ਮਿਆਰ' ਤੈਅ ਕੀਤਾ ਸੀ ਓਸ ਮਾਤਿਬਕ ਤਾਂ ਟਰੱਕਰਜ ਨੂੰ ਉਹਨਾਂ ਦੀਆਂ ਵਾਜਿਬ / ਗੈਰ-ਵਾਜਿਬ ਮੰਗਾਂ ਪੂਰੀਆਂ ਹੋਣ ਤੱਕ ਪ੍ਰੋਟੈਸਟ ਦਾ ਹੱਕ ਹੈ। ਕਥਿਤ ਕਿਸਾਨ ਮੋਰਚੇ ਨੇ 20 ਮਿਲੀਅਨ ਲੋਕਾਂ ਦੇ ਸ਼ਹਿਰ ਦਿੱਲੀ ਨੂੰ ਸਾਲ ਭਰ ਘੇਰੀ ਰੱਖਿਆ ਸੀ ਜਦਕਿ ਆਟਵਾ ਤਾਂ ਇੱਕ ਮਿਲੀਅਨ ਤੋਂ ਕੁਝ ਵੱਧ ਵੱਸੋਂ ਦਾ ਹੀ ਸ਼ਹਿਰ ਹੈ ਅਤੇ ਪ੍ਰੋਟੈਸਟਰ ਵੀ ਬਹੁਤ ਘੱਟ ਗਿਣਤੀ ਵਿੱਚ ਹਨ। ਵੇਖੋ ਜਮਹੂਰੀ ਹੱਕਾਂ ਦਾ ਕਥਿਤ ਆਲੰਬਰਦਾਰ ਟਰੂਡੋ ਇਸ ਟਰੱਕਰਜ਼ ਪ੍ਰੋਟੈਸਟ ਦੇ ਆਗੂਆਂ ਨਾਲ ਕਦ ਮੁਲਾਕਾਤ ਕਰਦਾ ਹੈ!

-ਬਲਰਾਜ ਦਿਓਲ, ਖ਼ਬਰਨਾਮਾ #1168, ਫਰਵਰੀ 11-2022

 


ਮਲਿਕ ਨਾਲ ਸੀਟੀ ਰਲ਼ ਗਈ ਹੈ ਤਾਂ ਹੁਣ ਬੰਬਘਾੜਾ ਬਹੁਤੀ ਦੂਰ ਨਹੀਂ!

ਪੰਜ ਜਨਵਰੀ ਨੂੰ ਜਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਪੰਜਾਬ ਵਿੱਚ ਇੱਕ ਰੈਲੀ ਨੂੰ ਸੰਬੋਧਨ ਕਰਨਾ ਸੀ, ਤਾਂ ਕਿਸਾਨਾਂ ਦੇ ਨਾਮ ਉੱਤੇ ਮੁੱਖ ਹਾਈਵੇਅ ਬਲਾਕ ਕਰਨ ਵਾਲੇ ਮੁਜ਼ਾਹਰਾਕਾਰੀਆਂ ਰਸਤਾ ਰੋਕ ਲਿਆ ਜਿਸ ਕਾਰਨ ਮੋਦੀ ਦਾ ਕਾਫਲਾਂ 20 ਕੁ ਮਿੰਟ ਰੁਕਣ ਪਿੱਛੋਂ ਵਾਪਸ ਪਰਤ ਗਿਆ। ਪ੍ਰਧਾਨ ਮੰਤਰੀ ਨੂੰ ਵਾਪਸ ਦਿੱਲੀ ਮੁੜਨਾ ਪਿਆ ਅਤੇ ਅਜੇਹੀ ਘਟਨਾ ਪਹਿਲਾਂ ਕਦੇ ਨਹੀਂ ਵਾਪਰੀ। ਜਦ ਅੱਤਵਾਦ ਦੀ ਸਿਖਰ ਸੀ ਤਾਂ ਪ੍ਰਧਾਨ ਮੰਤਰੀ ਵਜੋਂ ਰਾਜੀਵ ਗਾਂਧੀ, ਚੰਦਰਸ਼ੇਖਰ ਅਤੇ ਵੀਪੀ ਸਿੰਘ ਦੀਆਂ ਪੰਜਾਬ ਫੇਰੀਆਂ ਨਿਰਵਿਘਨ ਹੋਈਆਂ ਸਨ। ਰਾਜੀਵ ਗਾਂਧੀ ਦੇ ਕਾਰਜਕਾਲ ਦੌਰਾਨ ਜਦ ਪੰਜਾਬ ਵਿੱਚ ਭਾਰੀ ਹੜ੍ਹ ਆਏ ਸਨ ਤਾਂ ਮੌਕੇ ਦਾ ਜਾਇਜ਼ ਲੈਣ ਆਏ ਗਾਂਧੀ ਨੇ ਮੰਡ ਖੇਤਰ ਵਿੱਚ ਆਪਣੀ ਜੀਵ ਆਪ ਚਲਾ ਕੇ ਸੱਭ ਨੂੰ ਹੈਰਾਨ ਕਰ ਦਿੱਤਾ ਸੀ ਕਿਉਂਕਿ ਇਹ ਖੇਤਰ ਅੱਤਵਾਦੀ ਗੱਤੀਵਿਧੀਆਂ ਲਈ ਜਾਣਿਆਂ ਜਾਂਦਾ ਸੀ। ਅੱਜ ਜਦ ਪੰਜਾਬ ਸੁਰੱਖਿਅਤ ਸਮਝਿਆ ਜਾਂਦਾ ਹੈ ਤਾਂ ਪ੍ਰਧਾਨ ਮੰਤਰੀ ਮੋਦੀ ਦੀ ਸੁਰੱਖਿਆ ਨੂੰ ਏਨਾ ਖ਼ਤਰਾ ਪੈਦਾ ਹੋ ਗਿਆ ਕਿ ਫੇਰੀ ਹੀ ਰੱਦ ਕਰਨੀ ਪਈ।

ਇਸ ਮਾਮਲੇ ਵਿੱਚ ਪੰਜਾਬ ਸਰਕਾਰ ਅਤੇ ਪੰਜਾਬ ਪੁਲਿਸ ਦੀ ਕਾਰਗੁਜ਼ਾਰੀ ਪੂਰੀ ਤਰਾਂ ਸ਼ੱਕ ਦੇ ਘੇਰੇ ਵਿੱਚ ਹੈ ਜਿਸ ਦੀ ਜਾਂਚ ਲਈ ਸੁਪਰੀਮ ਕੋਰਟ ਨੇ ਇੱਕ ਕਮੇਟੀ ਦਾ ਗਠਨ ਵੀ ਕੀਤਾ ਹੈ। ਪੰਜ ਜਨਵਰੀ ਨੂੰ ਪੰਜਾਬ ਫੇਰੀ ਵਿੱਚੇ ਛੱਡ ਕੇ ਦਿੱਲੀ ਪਰਤਣ ਵਾਲੇ ਪ੍ਰਧਾਨ ਮੰਤਰੀ ਮੋਦੀ ਨੇ ਸ੍ਰੀ ਗੁਰੂ ਗੋਬਿੰਦ ਸਾਹਿਬ ਦੇ ਸਹਿਬਜ਼ਾਦਿਆਂ ਦੀ ਸ਼ਹੀਦੀ ਨੂੰ ਹਰ ਸਾਲ ਕੌਮੀ ਪੱਧਰ ਉੱਤੇ ਯਾਦ ਕਰਨ ਲਈ 26 ਦਸੰਬਰ ਨੂੰ 'ਵੀਰ ਬਾਲ ਦਿਵਸ' ਵਜੋਂ ਮਨਾਉਣ ਦਾ ਐਲਾਨ ਕਰ ਦਿੱਤਾ। ਕੁਝ ਸਿੱਖ ਆਗੂਆਂ ਨੇ ਇਸ ਦਾ ਬਹੁਤ ਭੱਦਾ ਵਿਰੋਧ ਕੀਤਾ ਹੈ ਜਿਹਨਾਂ ਵਿੱਚ ਸ਼੍ਰੋਮਣੀ ਕਮੇਟੀ ਦਾ ਪ੍ਰਧਾਨ ਹਰਜਿੰਦਰ ਸਿੰਘ ਧਾਮੀ ਵੀ ਸ਼ਾਮਲ ਹੈ, ਜੋਕਿ ਕਿੱਤੇ ਵਜੋਂ ਵਕੀਲ ਹੈ। ਧਾਮੀ ਸਮੇਤ ਵਿਰੋਧ ਕਰਨ ਵਾਲਿਆਂ ਦਾ ਕਹਿਣਾ ਹੈ ਕਿ ਸਾਹਿਬਜਾ਼ਦਿਆਂ ਨੂੰ 'ਵੀਰ ਬਾਲ' ਭਾਵ ਬਾਲਕ ਕਹਿਣਾ ਸਹੀ ਨਹੀਂ ਹੈ ਅਤੇ ਸਿੱਖ ਉਹਨਾਂ ਨੂੰ 'ਬਾਬਾ' ਆਖ ਕੇ ਸੰਬੋਧਨ ਕਰਦੇ ਹਨ। ਇਹ ਵਿਰੋਧ ਨਿਰੀ ਰਾਜਨੀਤੀ ਹੈ ਅਤੇ ਸਿੱਖ ਕੱਟੜਪੰਥੀਆਂ ਨੂੰ ਖੁਸ਼਼ ਕਰਨ ਦੀ ਕੋਸ਼ਿਸ਼ ਹੈ। ਸਿੱਖ ਜਾਣਦੇ ਹਨ ਕਿ ਛੇਵੇਂ ਗੁਰੂ ਸ੍ਰੀ ਹਰਕ੍ਰਿਸ਼ਨ ਨੂੰ ਅਕਸਰ ਬਾਲ ਗੁਰੂ ਵੀ ਆਖਿਆ ਜਾਂਦਾ ਹੈ। ਸ਼ਾਇਦ ਹੁਣ ਇਹ ਆਖਣਾ ਵੀ ਬੰਦ ਕਰ ਜਾਂ ਕਰਵਾ ਦੇਣ। ਵੀਰ ਬਾਲ ਜਾਂ ਬਹਾਦੁਰ ਬਾਲਕ ਆਖਣ ਵਿੱਚ ਕੋਈ ਤੌਹੀਨ ਨਹੀਂ ਹੈ।

ਬਹੁਤ ਸਾਰੇ ਸਿੱਖਾਂ ਨੇ ਇਸ ਐਲਾਨ ਦਾ ਸਮਰਥਨ ਕੀਤਾ ਹੈ। ਕੁਝ ਕੁ ਨੇ ਇਸ ਨੂੰ ਮੋਦੀ ਜਾਂ ਭਾਜਪਾ ਦੀ ਰਾਜਨੀਤੀ ਵੀ ਆਖਿਆ ਹੈ। ਕੁਝ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਮੋਦੀ ਨੇ ਇੱਕ ਤੀਰ ਨਾਲ ਦੋ ਜਾਂ ਵੱਧ ਨਿਸ਼ਾਨੇ ਸਾਧੇ ਹਨ। ਖਾਸਕਰ ਭਾਰਤ ਦੇ ਪਹਿਲੇ ਪ੍ਰਧਾਨ ਮੰਤਰੀ ਜਵਾਹਰ ਲਾਲ ਨਹਿਰੂ ਦੇ ਜਨਮ ਦਿਵਸ 14 ਨਵੰਬਰ ਨੂੰ, ਜੋ ਬਾਲ ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ। ਵੈਨਕੂਵਰ ਨਿਵਾਸੀ ਅਖੰਡ ਕੀਰਤਨੀ, ਵੱਖਵਾਦੀ ਅਤੇ ਕੱਟੜਪੰਥੀ ਵਜੋਂ ਜਾਣੇ ਜਾਂਦੇ ਅਮੀਰ ਸਿੱਖ ਰਿਪੁਦਾਮਨ ਸਿੰਘ ਮਲਿਕ ਵਲੋਂ ਪ੍ਰਧਾਨ ਮੰਤਰੀ ਮੋਦੀ ਨੂੰ ਇੱਕ ਖ਼ਤ ਲਿਖ ਕੇ 'ਵੀਰ ਬਾਲ ਦਿਵਸ' ਸਮੇਤ ਸਿੱਖਾਂ ਦੇ ਹਿੱਤ ਵਿੱਚ ਮੋਦੀ ਵਲੋਂ ਲਏ ਗੇ ਹੋਰ ਕਈ ਫੈਸਲਿਆਂ ਦੀ ਸ਼ਲਾਘਾ ਕੀਤੀ ਹੈ। ਹੈਰਾਨੀ ਵਾਲੀ ਗੱਲ ਹੈ ਕਿ ਇੱਕ ਵਿਦੇਸ਼ੀ ਸਿੱਖ ਵਲੋਂ ਮੋਦੀ ਨੂੰ ਲਿਖਿਆ ਗਿਆ ਖ਼ਤ ਭਾਰਤ ਦੇ ਕੌਮੀ ਮੀਡੀਆ ਦੇ ਹੱਥ ਕਿਵੇਂ ਆ ਗਿਆ ਅਤੇ ਇਸ ਦੀ ਕੌਮੀ ਮੀਡੀਆ ਵਿੱਚ ਵੱਡੀ ਪੱਧਰ ਉੱਤੇ ਚਰਚਾ ਕਿਵੇਂ ਹੋ ਗਈ? ਇਹ ਖਤ ਅਤੇ ਤੁਰਤ ਪਬਲਿਸਿਟੀ ਵੱਡੀ ਪਲਾਨ ਨਾਲ ਕੀਤਾ ਸਟੇਜ ਸ਼ੋਅ ਜਾਪਦਾ ਹੈ। ਰਿਪੁਦਾਮਨ ਮਲਿਕ 2019 ਵਿੱਚ ਭਾਰਤ ਦੀ ੁਇੱਕ ਵਿਸ਼ੇਸ਼ 'ਵੀਆਈਪੀ' ਫੇਰੀ ਲਗਾ ਆਇਆ ਹੈ। ਮਲਿਕ ਉਹ ਵਿਅਕਤੀ ਹੈ ਜਿਸ ਨੂੰ ਜੂਨ 1985 ਵਿੱਚ ਵਾਪਰ ਏਅਰ ਇੰਡੀਆ ਬੰਬ ਕਾਂਡ ਦਾ 'ਫਾਇਨਾਂਸਰ' ਆਖਿਆ ਜਾਂਦਾ ਹੈ ਅਤੇ ਉਸ ਦੇ ਕਥਿਤ ਰੋਲ ਦੀ ਚਰਚਾ ਕਨੇਡੀਅਨ ਮੀਡੀਆ ਅਤੇ ਕਈ ਕਿਤਾਬਾਂ ਵਿੱਚ ਬਹੁਤ ਵਿਸਥਾਰ ਨਾਲ ਹੋਈ ਹੈ। ਇਸ ਬੰਬ ਕਾਂਡ ਵਿੱਚ 329 ਬੇਕਸੂਰ ਮਾਰੇ ਗਏ ਸਨ ਪਰ ਅੱਜ ਤੱਕ ਸਿਰਫ ਇੱਕ ਵਿਅਕਤੀ ਇੰਦਰਜੀਤ ਸਿੰਘ ਰਿਆਤ ਨੂੰ ਹੀ ਸਜ਼ਾ ਹੋਈ ਹੈ ਜਿਸ ਨੂੰ 'ਬੰਬਘਾੜਾ' ਮੰਨਿਆਂ ਜਾਂਦਾ ਹੈ। ਮਲਿਕ ਨੇ ਹਮੇਸ਼ਾ ਰਿਆਤ ਅਤੇ ਉਸ ਦੇ ਪਰਿਵਾਰ ਦੀ ਸਪੋਰਟ ਕੀਤੀ ਹੈ ਅਤੇ ਉਸ ਦੀ ਪਤਨੀ ਨੂੰ ਆਪਣੇ ਸੰਗਠਨ (ਸਤਿਨਾਮ ਟੱਰਸਟ) ਵਿੱਚ ਨੌਕਰੀ ਵੀ ਦੇਈ ਰੱਖੀ ਹੈ। ਇਹ ਸਾਜਿਸ਼ ਅਜੇ ਤੱਕ ਪੂਰੀ ਤਰਾਂ ਬੇਨਕਾਬ ਨਹੀਂ ਹੋਈ। ਅੱਜ ਮੋਦੀ ਸਰਕਾਰ ਦੀ ਮਲਿਕ ਨਾਲ ਸੀਟੀ ਰਲ਼ ਗਈ ਹੈ ਤਾਂ ਬੰਬਘਾੜਾ ਹੁਣ ਬਹੁਤੀ ਦੂਰ ਨਹੀਂ ਰਿਹਾ। ਸਾਜਿਸ਼ਘਾੜਾ ਤਲਵਿੰਦਰ ਸਿੰਘ ਪਰਮਾਰ ਵੀ ਮਲਿਕ ਦੇ ਬੇਲੀ ਸੀ। ਕੀ ਮਲਿਕ ਇਸ ਘਿਨੌਣੇ ਦਹਿਸ਼ਤਗਰਦ ਕਾਂਡ ਨੂੰ ਬੇਪਰਦ ਕਰੇਗਾ?

-ਬਲਰਾਜ ਦਿਓਲ, ਖ਼ਬਰਨਾਮਾ #1165, ਜਨਵਰੀ 21-2022

 


ਗਣਤੰਤਰ ਦਿਵਸ ਅਤੇ ਸੁਬਾਈ ਚੋਣਾਂ ਦੌਰਾਨ ਦਹਿਸ਼ਤੀ ਹਮਲਿਆਂ ਦਾ ਡਰ

ਦਿੱਲੀ ਦੀ ਗਾਜ਼ੀਪੁਰ ਫਲਾਵਰ ਮਾਰਕੀਟ (ਫੁੱਲ ਬਜ਼ਾਰ) ਵਿੱਚ ਇੱਕ ਲਾਵਾਰਸ-ਬੈਗ ਵਿਚ 3 ਕਿੱਲੋ ਵਿਸਫਟਕ ਸਮੱਗਰੀ ਦਾ 'ਕੱਚਾ-ਬੰਬ' ਮਿਲਿਆ ਹੈ ਜਿਸ ਦਾ ਸਮੇਂ ਸਿਰ ਪਤਾ ਲੱਗ ਜਾਣ ਕਾਰਨ ਬਚਾਅ ਹੋ ਗਿਆ ਹੈ। ਦਿੱਲੀ ਪੁਲਸ ਕਮਿਸ਼ਨਰ ਰਾਕੇਸ਼ ਅਸਥਾਨਾ ਨੇ ਦੱਸਿਆ ਹੈ ਕਿ ਆਈ.ਈ.ਡੀ. ਵਿਸਫੋਟਕ ਵਾਲਾ ਬੈਗ ਮਿਲਿਆ, ਜਿਸ ਨੂੰ ਪੁਲਿਸ ਦੇ ਵਿਸ਼ੇਸ਼ ਦਸਤੇ ਨੇ ਸੁਰੱਖਿਅਤ ਢੰਗ ਨਾਲ ਨਕਾਰਾ ਕਰ ਦਿੱਤਾ। ਅਗਰ ਇਹ ਬੰਬ ਇਸ ਮਾਰਕੀਠ ਵਿੱਚ ਫਟ ਜਾਂਦਾ ਤਾਂ ਭਾਰੀ ਜਾਨੀ ਅਤੇ ਮਾਲੀ ਨੁਕਸਾਨ ਹੋ ਸਕਦਾ ਸੀ। ਉਧਰ ਪੰਜਾਬ ਵਿੱਚ ਅੰਮ੍ਰਿਤਸਰ ਦੇ ਸਰਹੱਦੀ ਪਿੰਡ ਧਨੋਏ ਕਲਾਂ ਤੋਂ 5 ਕਿਲੋ ਧਮਾਕਾਖੇਜ਼ ਸਮੱਗਰੀ ਮਿਲੀ ਹੈ। ਸੂਤਰਾਂ ਅਨੁਸਾਰ ਇਹ ਸਮਗਰੀ 26 ਜਨਵਰੀ ਮੌਕੇ ਕੋਈ ਵੱਡਾ ਧਮਾਕਾ ਕਰਨ ਲਈ ਭੇਜੀ ਗਈ ਹੋ ਸਕਦੀ ਹੈ ਅਤੇ ਪੁੱਛ-ਪੜਤਾਲ ਕੀਤੀ ਜਾ ਰਹੀ ਹੈ।

ਪੰਜਾਬ ਪੁਲਿਸ ਵਲੋਂ ਇੰਟਰਨੈਸ਼ਨਲ ਸਿੱਖ ਯੂਥ ਫੈਡਰੇਸ਼ਨ (ਆਈ. ਐਸ. ਵਾਈ. ਐਫ.) ਦੇ ਗ੍ਰਿਫ਼ਤਾਰ ਕਾਰਕੁੰਨ ਦੀ ਨਿਸ਼ਾਨਦੇਹੀ 'ਤੇ 2.5 ਕਿੱਲੋ ਆਰ. ਡੀ. ਐਕਸ., ਇਕ ਡੈਟੋਨੇਟਰ, ਕੋਡੈਕਸ ਤਾਰ, 5 ਧਮਾਕਾਖੇਜ਼ ਫਿਊਜ਼, ਏ. ਕੇ. 47 ਦੇ 12 ਜ਼ਿੰਦਾ ਕਾਰਤੂਸ ਬਰਾਮਦ ਕਰਨ 'ਚ ਸਫ਼ਲਤਾ ਹਾਸਲ ਕੀਤੀ ਗਈ ਹੈ। ਇਹ ਬਰਾਮਦਗੀ ਗੁਰਦਾਸਪੁਰ ਦੇ ਪਿੰਡ ਲਖਨਪਾਲ ਦੇ ਰਹਿਣ ਵਾਲੇ ਅਮਨਦੀਪ ਕੁਮਾਰ ਉਰਫ਼ ਮੰਤਰੀ ਵਲੋਂ ਕਰਵਾਈ ਗਈ ਹੈ, ਜੋ ਕਿ ਪਠਾਨਕੋਟ 'ਚ ਹਾਲ ਹੀ 'ਚ ਵਾਪਰੇ ਹੱਥ ਗੋਲੇ ਧਮਾਕਿਆਂ ਦੀਆਂ ਦੋ ਘਟਨਾਵਾਂ ਦਾ ਮੁੱਖ ਮੁਲਜ਼ਮ ਹੈ। ਅਮਨਦੀਪ ਉਰਫ਼ ਮੰਤਰੀ ਇੰਟਰਨੈਸ਼ਨਲ ਸਿੱਖ ਯੂਥ ਫੈਡਰੇਸ਼ਨ (ਆਈ ਐਸ ਵਾਈ ਐਫ) ਦੇ ਉਹਨਾਂ 6 ਕਾਰਕੁਨਾ ਵਿਚੋਂ ਹੈ, ਜਿਨ੍ਹਾਂ ਨੇ ਪਠਾਨਕੋਟ ਆਰਮੀ ਕੈਂਪ ਸਮੇਤ ਪਠਾਨਕੋਟ 'ਚ ਦੋ ਹੱਥ ਗੋਲੇ ਦੇ ਧਮਾਕੇ ਕਰਨ ਦੀ ਗੱਲ ਕਬੂਲੀ ਸੀ। ਪੰਜਾਬ ਪੁਲਿਸ ਨੇ ਦਾਅਵਾ ਕੀਤਾ ਹੈ ਕਿ ਇਹ ਖੇਪ ਪਾਕਿਸਤਾਨ ਵਿੱਚ ਡੇਰਾ ਲਾਈ ਬੈਠੇ ਆਈ. ਐਸ. ਵਾਈ. ਐਫ. ਦੇ ਪ੍ਰਧਾਨ ਲਖਬੀਰ ਸਿੰਘ ਰੋਡੇ ਵਲੋਂ ਅਮਨਦੀਪ ਨੂੰ ਆਪਣੇ ਸਾਥੀ ਅਤੇ ਇਸ ਮਡਿਊਲ ਦੇ ਹੈਂਡਲਰ ਸੁਖਪ੍ਰੀਤ ਸਿੰਘ ਉਰਫ਼ ਸੁੱਖ ਵਾਸੀ ਪਿੰਡ ਖਰਲ, ਦੀਨਾਨਗਰ ਰਾਹੀਂ ਮੁਹੱਈਆ ਕਰਵਾਈ ਗਈ ਸੀ। ਅਮਨਦੀਪ ਉਰਫ਼ ਮੰਤਰੀ ਤੋਂ ਇਲਾਵਾ ਗੁਰਵਿੰਦਰ ਸਿੰਘ ਉਰਫ਼ ਗਿੰਦੀ ਪਿੰਡ ਖਰਲ (ਗੁਰਦਾਸਪੁਰ), ਪਰਮਿੰਦਰ ਕੁਮਾਰ ਰੋਹਿਤ ਉਰਫ਼ ਰੋਹਤਾ ਵਾਸੀ ਖਰਲ, ਰਜਿੰਦਰ ਸਿੰਘ ਉਰਫ਼ ਮੱਲ੍ਹੀ ਉਰਫ਼ ਨਿੱਕੂ ਵਾਸੀ ਗੁਨੂੰਪੁਰ, ਹਰਪ੍ਰੀਤ ਸਿੰਘ ਉਰਫ਼ ਢੋਲਕੀ ਵਾਸੀ ਗੋਤਪੋਕ ਅਤੇ ਰਮਨ ਕੁਮਾਰ ਵਾਸੀ ਗਾਜੀਕੋਟ (ਗੁਰਦਾਸਪੁਰ) ਦਾ 20 ਜਨਵਰੀ ਤੱਕ ਪੁਲਿਸ ਰਿਮਾਂਡ ਪ੍ਰਾਪਤ ਕੀਤਾ ਗਿਆ ਹੈ। ਇਹਨਾਂ ਨੂੰ ਨਵਾਂਸ਼ਹਿਰ ਪੁਲਿਸ ਵਲੋਂ 10 ਜਨਵਰੀ ਨੂੰ ਕਾਬੂ ਕਰ ਕੇ 6 ਹੱਥ ਗੋਲੇ, 1 ਪਿਸਤੌਲ, 1 ਰਾਈਫ਼ਲ, ਜ਼ਿੰਦਾ ਰੌਂਦ ਤੇ ਮੈਗਜ਼ੀਨ ਬਰਾਮਦ ਕੀਤਾ ਸੀ। ਪੁਲਿਸ ਮੁਤਾਬਿਕ ਗ੍ਰਿਫ਼ਤਾਰ ਕੀਤੇ ਗਏ ਸਾਰੇ ਕਥਿਤ ਦੋਸ਼ੀਆਂ ਦੀਆਂ ਤਾਰਾਂ ਵੱਖਰੇ-ਵੱਖਰੇ ਤੌਰ 'ਤੇ ਪਾਕਿਸਤਾਨ 'ਚ ਬੈਠੇ ਇੰਟਰਨੈਸ਼ਨਲ ਸਿੱਖ ਯੂਥ ਫੈਡਰੇਸ਼ਨ ਦੇ ਆਗੂ ਲਖਵੀਰ ਸਿੰਘ ਰੋਡੇ ਨਾਲ ਜੁੜੀਆਂ ਹੋਈਆਂ ਹਨ।

ਉਧਰ ਅਮਰੀਕਾ ਬੈਠੇ 'ਰਫਰੈਂਡਮ' ਵਾਲੇ ਗੁਰਪਤਵੰਤ ਸਿੰਘ ਪਨੂੰ ਵਲੋਂ ਧਮਕੀ ਦਿੱਤੀ ਗਈ ਹੈ ਕਿ 26 ਜਨਵਰੀ ਨੂੰ ਭਾਰਤ ਦੇ ਗਣਤੰਤਰ ਦਿਵਸ ਮੌਕੇ ਤਿਰੰਗੇ ਦੀ ਜਗ੍ਹਾ ਖਾਲਿਸਤਾਨੀ ਝੰਡਾ ਲਹਿਰਾਇਆ ਜਾਵੇਗਾ। ਖਾਲਿਸਤਾਨੀ ਗਰੁੱਪ ਕਥਿਤ 'ਸਿੱਖਸ ਫਾਰ ਜਸਟਿਸ' ਵਲੋਂ ਅਕਸਰ ਸਮੇਂ ਸਮੇਂ ਅਜੇਹੀਆਂ ਧਮਕੀਆਂ ਦਿੱਤੀਆਂ ਝਾਦੀਆਂ ਹਨ ਅਤੇ ਖਾਲਿਸਤਾਨ ਦੇ ਝੰਡੇ ਲਹਿਰਾਉਣ ਵਾਲਿਆਂ ਨੂੰ ਵੱਡੇ 'ਇਨਾਮ' ਦੇਣ ਦੇ ਵਾਅਦੇ ਵੀ ਕੀਤੇ ਜਾਂਦੇ ਹਨ। 26 ਜਨਵਰੀ 2021 ਨੁੰ ਕਿਸਾਨ ਅੰਦੋਲਨ ਦੇ ਟਰਕਟਰ ਮਾਰਚ ਦੇ ਪਰਦੇ ਹੇਠ ਲਾਲ ਕਿਲੇ ਉੱਤੇ ਖਰੂਦੀਆਂ ਵਲੋਂ ਹੜਕੰਪ ਮਚਾਇਆ ਗਿਆ ਸੀ ਅਤੇ ਪੁਲਿਸ ਉੱਤੇ ਹਮਲੇ ਕੀਤੇ ਗਏ ਸਨ।

ਪੰਜ ਜਨਵਰੀ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪੰਜਾਬ ਫੇਰੀ ਮੌਕੇ ਸੜਕ ਰੋਕੇ ਜਾਣ ਦੇ ਮਾਮਲੇ ਦੀ ਅਜੇ ਜਾਂਚ ਚੱਲ ਰਹੀ ਹੈ ਅਤੇ ਸੁਪਰੀਮ ਕੋਰਟ ਨੇ ਇੱਕ ਵਿਸ਼ੇਸ਼ ਟੀਮ ਦਾ ਗਠਨ ਕੀਤਾ ਹੈ। ਇਸ ਮਾਮਲੇ ਵਿੱਚ ਪੰਜਾਬ ਪੁਲਿਸ ਅਤੇ ਪੰਜਾਬ ਸਰਕਾਰ ਦੀ ਕਾਰਗੁਜ਼ਾਰੀ ਸ਼ੱਕ ਦੇ ਘੇਰੇ ਵਿੱਚ ਹੈ। ਪਕਿਸਤਾਨ ਤੋਂ ਡਰੋਨਾ ਰਹੀਂ ਹਥਿਆਰ ਅਤੇ ਨਸ਼ੀਲੇ ਪਦਾਰਥ ਸਮਗਲ ਕਰਨ ਦ ਮਾਮਲੇ ਲਗਾਤਾਰ ਵਧ ਰਹੇ ਹਨ। 26 ਜਨਵਰੀ ਨੂੰ ਆ ਰਹੇ ਗਣਤੰਤਰ ਦਿਵਸ ਅਤੇ ਪੰਜ ਸੂਬਿਆਂ ਦੀਆਂ ਚੋਣਾਂ ਦੌਰਾਨ ਦਹਿਸ਼ਤੀ ਹਮਲਿਆਂ ਦਾ ਡਰ ਵਧ ਗਿਆ ਹੈ।

-ਬਲਰਾਜ ਦਿਓਲ, ਖ਼ਬਰਨਾਮਾ #1164, ਜਨਵਰੀ 14-2022

 


ਵੇਖੋ ਖੇਤੀ ਵਿਭਿੰਨਤਾ ਤੇ ਵਿੱਤੀ ਗਰਕਣ ਵਿੱਚੋਂ ਕੱਢਣ ਦਾ ਪ੍ਰੋਗਰਾਮ ਕਿਹੜੀ ਪਾਰਟੀ ਪੇਸ਼ ਕਰਦੀ ਹੈ?

ਪੰਜਾਬ ਅਸੰਬਲੀ ਦੀਆਂ ਚੋਣਾਂ ਦਾ ਮਹੌਲ ਦਿਨੋ ਦਿਨ ਭਖ ਰਿਹਾ ਹੈ ਅਤੇ ਇਸ ਦੇ ਪਹਿਲੇ ਦੌਰ ਵਿੱਚ ਦਲ-ਬਦਲੂਆਂ ਦੇ ਡੱਡੂ ਛੜੱਪੇ ਵੇਖਣ ਨੂੰ ਮਿਲ ਰਹੇ ਹਨ। ਇਹ ਡੱਡੂ ਛੜੱਪੇ ਟਿਕਟਾਂ ਦੀ ਵੰਡ ਦੇ ਆਖਰੀ ਦਿਨ ਤੱਕ ਜਾਰੀ ਰਹਿਣਗੇ। ਜਿਸ ਅਭਿਲਾਸ਼ੀ ਨੂੰ ਓਸ ਦੀ ਪਾਰਟੀ ਨੇ ਟਿਕਟ ਨਾ ਦਿੱਤੀ ਉਹ ਟਿਕਟ ਦੀ ਲਾਲਸਾ ਵਿੱਚ ਆਖਰੀ ਦਿਨ ਵੀ ਛੜੱਪਾ ਮਾਰ ਜਾਵੇਗਾ। ਜਿਸ ਨੂੰ ਸਮੇਂ ਛੜੱਪਾ ਮਾਰਨ ਦਾ ਇਹ ਚਾਂਸ ਨਸੀਬ ਨਾ ਹੋਇਆ ਉਹ ਆਪਣੀ ਪਾਰਟੀ ਦੇ ਉਮੀਦਵਾਰ ਨੂੰ ਹਰਾਉਣ ਲਈ ਅੰਦਰਖਾਤੇ ਕਿਸੇ ਵਿਰੋਧੀ ਉਮੀਦਵਾਰ ਨੂੰ ਵੋਟਾਂ ਪਵਾਏਗਾ ਤਾਂਕਿ ਸ਼ਰੀਕ ਦੀ ਜੜ੍ਹ ਹੀ ਨਾ ਲੱਗਣ ਦਿੱਤੀ ਜਾਵੇ।

ਅਜੇ ਤੱਕ ਭਾਵੇਂ ਕਿਸੇ ਪਾਰਟੀ ਨੇ ਆਪਣਾ ਮੁਕੰਮਲ 'ਚੋਣ ਮੈਨੀਫੈਸਟੋ' ਜਾਰੀ ਨਹੀਂ ਕੀਤਾ ਪਰ ਕਿਸ਼ਤਾਂ ਵਿੱਚ ਲੋਕ-ਲਭਾਊ ਐਲਾਨ ਆਏ ਦਿਨ ਕੀਤੇ ਜਾ ਰਹੇ ਹਨ। ਅਗਰ ਇੱਕ ਸਿਆਸੀ ਪਾਰਟੀ ਨੇ 18 ਸਾਲ ਤੋਂ ਵੱਧ ਉਮਰ ਦੀਆਂ ਔਰਤਾਂ ਨੂੰ ਹਰ ਮਹੀਨੇ 1000 ਰੁਪਏ ਦੇਣ ਦਾ ਐਲਾਨ ਕੀਤਾ ਤਾਂ ਦੂਜੀ ਪਾਰਟੀ ਨੇ 2000 ਰੁਪਏ ਮਹੀਨਾ ਦੇਣ ਦੀ ਗੱਲ ਆਖ ਦਿੱਤੀ ਹੈ। ਬਿਜਲੀ ਦੀਆਂ ਸੈਂਕੜੇ ਯੂਨਿਟਾਂ ਮੁਫਤ ਦੇਣ ਦੇ ਐਲਾਨਾਂ ਦਾ ਵੀ ਮੁਕਾਬਲਾ ਚੱਲ ਰਿਹਾ ਹੈ। ਕੈਪਟਨ ਅਮਰਿੰਦਰ ਸਿੰਘ ਸਰਕਾਰ ਨੇ 6 ਕੁ ਮਹੀਨੇ ਪਹਿਲਾਂ ਔਰਤਾਂ ਨੂੰ ਸਰਕਾਰੀ ਬੱਸਾਂ ਵਿੱਚ ਮੁਫਤ ਯਾਤਰਾ ਦੀ ਸੁਵਿਧਾ ਦਿੱਤੀ ਸੀ ਜਦਕਿ ਪੰਜਾਬ ਰੋਡਵੇਜ਼ ਅਤੇ ਬਿਜਲੀ ਬੋਰਡ ਪਹਿਲਾਂ ਹੀ ਵੱਡੇ ਘਾਟੇ ਵਿੱਚ ਚੱਲ ਰਹੇ ਹਨ। ਪੰਜਾਬ ਸਰਕਾਰ ਤਾਂ ਇਸ ਹੱਦ ਤੱਕ ਕਰਜ਼ੇ ਵਿੱਚ ਗਰਕ ਹੋ ਚੁੱਕੀ ਹੈ ਕਿ ਇਸ ਦੀਆਂ ਕਿਸ਼ਤਾਂ ਦੇਣੀਆਂ ਮੁਸ਼ਕਲ ਹੋ ਗਈਆਂ ਹਨ ਅਤੇ ਦੂਜੇ ਪਾਸੇ ਸਰਕਾਰ ਆਪਣੇ ਮੁਲਾਜ਼ਮਾਂ ਨੂੰ ਸਮੇਂ ਸਿਰ ਤਨਖਾਹ ਦੇਣ ਵਿੱਚ ਅਸਮਰਥ ਹੈ। ਮੁੱਖ ਮੰਤਰੀ ਚੰਨੀ ਨੇ ਵੱਖ ਵੱਖ ਵਰਗਾਂ ਲਈ ਤਰਾਂ ਤਰਾਂ ਦੇ ਐਲਾਨ ਕਰਨ ਦਾ ਲੜੀਵਾਰ ਸਿਲਸਿਲਾ ਸ਼ੁਰੂ ਕੀਤਾ ਹੋਇਆ ਹੈ ਜਿਸ ਕਾਰਨ ਸੋਸ਼ਲ ਮੀਡੀਆ ਉੱਤੇ ਚੰਨੀ ਸੇ ਐਲਾਨਾ ਬਾਰੇ ਕਈ ਕਿਸਮ ਦੇ ਮਜ਼ਾਕ ਵੀ ਚੱਲ ਰਹੇ ਹਨ।

ਮੁਫਤ ਦੀਆਂ ਚੀਜ਼ਾਂ ਪੰਜਾਬ ਅਤੇ ਪੰਜਾਬੀਆਂ ਨੂੰ ਮਜ਼ਬੂਤ ਬਣਾਉਣ ਲਈ ਨਹੀਂ ਬਲਕਿ ਉਨ੍ਹਾਂ ਨੂੰ ਮਜਬੂਰ ਬਣਾਉਣ ਲਈ ਬਣਾਈਆਂ ਜਾ ਰਹੀਆਂ ਹਨ ਤਾਂ ਜੋ ਸਿਆਸੀ ਪਾਰਟੀਆਂ ਉਨ੍ਹਾਂ ਨੂੰ ਮੁਫ਼ਤਖੋਰੇ ਬਣਾਕੇ ਵੋਟਾਂ ਬਟੋਰ ਸਕਣ। ਇਹ ਸਰਕਾਰੀ ਪੈਸੇ ਨਾਲ ਵੋਟਾਂ ਖਰੀਦਣ ਦੀ ਕੋਸ਼ਿਸ਼ ਹੈ ਜੋ ਇਹ ਪਤਾ ਹੁੰਦੇ ਹੋਏ ਵੀ ਜਾਰੀ ਹੈ ਕਿ ਪੰਜਾਬ ਦੀ ਵਿਤੀ ਹਾਲਤ ਬਹੁਤ ਖਰਾਬ ਹੈ।

ਆਮ ਆਦਮੀ ਪਾਰਟੀ ਨੇ ਦਾਅਵਾ ਕੀਤਾ ਹੈ ਕਿ ਪੰਜਾਬ ਸਿਰ ਕੁੱਲ ਕਰਜ਼ਾ 3 ਲੱਖ ਕਰੋੜ ਹੋ ਗਿਆ ਅਤੇ ਇੰਝ  ਪੰਜਾਬ ਦੇ ਹਰ ਬੱਚੇ, ਬੁੱਢੇ ਤੇ ਜਵਾਨ ਸਿਰ ਇੱਕ ਇੱਕ ਲੱਖ ਰੁਪਏ ਕਰਜ਼ਾ ਬਣਦਾ ਹੈ। ਇੱਕ ਹੋਰ ਰਪੋਰਟ ਮੁਤਾਬਿਕ ਕੁੱਲ ਕਰਜ਼ਾ ਰਤਾ ਕੁ ਘੱਟ ਭਾਵ 2.82 ਲੱਖ ਕਰੋੜ ਬਣਦਾ ਹੈ। ਪੰਜ ਸਾਲ ਪਹਿਲਾਂ ਜਦ ਕਾਂਗਰਸ ਸਰਕਾਰ ਬਣੀ ਸੀ ਤਾਂ ਪੰਜਾਬ ਸਿਰ 1.82 ਲੱਖ ਕਰੋੜ ਦਾ ਕਰਜ਼ਾ ਸੀ ਜਿਸ ਵਿੱਚ ਕਾਂਗਰਸ ਦੇ ਰਾਜ ਵਿੱਚ 1 ਲੱਖ ਕਰੋੜ ਦਾ ਵਾਧਾ ਹੋਇਆ ਹੈ। ਪੰਜਾਬ ਸਰਕਾਰ ਦੀ ਕੁੱਲ ਆਮਦਨ (ਰੈਵਨਿਊ) ਦਾ 40% ਹਿੱਸਾ ਕਰਜ਼ੇ ਅਤੇ ਵਿਆਜ਼ ਦੀ ਅਦਾਇਗੀ ਉੱਤੇ ਖਰਚ ਹੁੰਦਾ ਹੈ। ਇਸ ਤਰਾਂ ਆਮਦਨ ਦਾ ਵੱਡਾ ਹਿਸਾ ਕਰਜ਼ੇ ਦੀ ਸਰਵਿਸ ਉੱਤੇ ਖਰਚ ਹੋ ਰਿਹਾ ਹੈ ਪਰ ਸਿਆਸੀ ਪਾਰਟੀਆਂ ਅਜੇ ਵੀ ਬਹੁਤ ਕੁਝ ਹੋਰ ਮੁਫਤ ਦੇਣ ਦੇ ਵਾਅਦੇ ਕਰੀ ਜਾਂਦੀਆਂ ਹਨ। ਇਹ 'ਪੱਲੇ ਨਹੀਂ ਧੇਲਾ ਅਤੇ ਕਰਦੇ ਮੇਲਾ ਮੇਲਾ' ਵਾਲੀ ਗੱਲ ਹੈ।

ਪੰਜਾਬ ਖੇਤੀ ਪ੍ਰਧਾਨ ਸੂਬਾ ਹੈ ਜਿਸ ਦੀ ਖੇਤੀ ਕਣਕ-ਝੋਨਾ ਸਾਈਕਲ, ਖਾਦਾਂ ਅਤੇ ਕੀੜੇਮਾਰ ਦਵਾਈਆਂ ਦੀ ਬੇਮੁਹਾਰੀ ਵਰਤੋਂ ਤੋਂ ਪੀੜ੍ਹਤ ਹੈ। ਇਸ ਨਾਲ ਪਾਣੀ ਸੰਕਟ ਮੰਡਲਾ ਰਿਹਾ ਹੈ ਅਤੇ ਵਾਤਾਵਰਣ ਪਲੀਤ ਹੋ ਰਿਹਾ ਹੈ। ਖੇਤੀ ਨੂੰ ਕਣਕ - ਝੋਨੇ ਦੇ ਸਾਈਕਲ ਵਿਚੋਂ ਕੱਢ ਕੇ ਵਿਭਿੰਨਤਾ ਵੱਲ ਲੈ ਜਾਣ ਦੀ ਲੋੜ ਹੈ। ਬੇਰੁਜ਼ਗਾਰੀ, ਨਸ਼ੇ, ਸਿਹਤ, ਵਿਦਿਆ, ਬੁਨਿਆਦੀ ਢਾਂਚਾ, ਇੰਡਸਟਰੀ ਅਤੇ ਵਿਤੀ ਗਰਕਣ ਵਿਚੋਂ ਕੱਢਣ ਵਾਲੇ ਪ੍ਰੋਗਰਾਮਾ ਦੀ ਲੋੜ ਹੈ। ਵੇਖੋ ਕਿਹੜੀ ਪਾਰਟੀ ਪੰਜਾਬ ਦੀਆ ਬੁਨਿਆਦੀ ਸਮੱਸਿਆਵਾਂ ਦੇ ਹੱਲ ਦੀ ਗੱਲ ਕਰਦੀ ਹੈ।

-ਬਲਰਾਜ ਦਿਓਲ, ਖ਼ਬਰਨਾਮਾ #1163, ਜਨਵਰੀ 07-2021

 


ਪਿਛਲੇ ਅੰਕ ਜਾਂ ਲੇਖ ਪੜ੍ਹਨ ਲਈ ਇੱਥੇ ਕਲਿੱਕ ਕਰੋ

hux qwk KLbrnfmf dI vYWb sfeIt nUM pfTk vyK cuwky hn

Click Here